ഇന്ത്യൻ ക്രിക്കറ്റ് ടീം മാനേജ്മെന്റും സീനിയർ താരങ്ങളും തമ്മിലുള്ള ആശയവിനിമയം മെച്ചപ്പെടുത്താൻ ലക്ഷ്യമിട്ട് പ്രത്യേക യോഗം വിളിച്ച് ബിസിസിഐ. ഇന്ത്യയും ദക്ഷിണാഫ്രിക്കയും തമ്മിലുള്ള രണ്ടാമത്തെ ഏകദിന മത്സരത്തിന് മുന്നോടിയായി ബുധനാഴ്ച റായ്പൂരിലായിരിക്കും യോഗം നടക്കുക. ഇന്ത്യൻ ടീം മാനേജ്മെന്റിന്റെ ഭാഗത്ത് നിന്ന് മുഖ്യപരിശീലകൻ ഗൗതം ഗംഭീർ, മുഖ്യസെലക്ടർ അജിത് അഗാർക്കർ എന്നിവരാകും യോഗത്തിൽ പങ്കെടുക്കുക. ബിസിസിഐ പ്രതിനിധികളായി സെക്രട്ടറി ദേവ്ജിത് സൈക്കിയ, ജോയിന്റ് സെക്രട്ടറി പ്രഭതേജ് സിങ് ഭാട്ടിയ എന്നിവർ യോഗത്തിലുണ്ടാവും. ബിസിസിഐ പ്രസിഡന്റ് മിഥുൻ മൻഹാൻസ് യോഗത്തിലെത്തുമോയെന്ന വ്യക്തത വരുത്തിയിട്ടില്ല.
'സീനിയർ താരങ്ങളുമായുള്ള ആശയവിനിമയം എന്ന വിഷയത്തിനപ്പുറം ഇന്ത്യൻ ക്രിക്കറ്റിന്റെ സമീപകാല പ്രകടനങ്ങളും ഭാവി പദ്ധതികളും യോഗത്തിൽ ചർച്ചയാകും. സമീപകാലത്ത് ഹോം ടെസ്റ്റ് മത്സരങ്ങളിൽ ഇന്ത്യയുടെ പ്രകടനം മോശമായിരുന്നു. ഗ്രൗണ്ടിലെ ആശയവിനിമയം ശരിയായി നടന്നില്ല. ഇക്കാര്യങ്ങൾ യോഗത്തിൽ ചർച്ചയായും.' ഒരു ബിസിസിഐ പ്രതിനിധി സ്പോർട്സ്റ്റാറിനോട് പ്രതികരിച്ചു.
'അടുത്ത വർഷം ഫെബ്രുവരി-മാർച്ച് മാസങ്ങളിലായി നടക്കുന്ന ട്വന്റി 20 ലോകകപ്പിൽ കിരീടം നിലനിർത്താൻ ഏറെ സാധ്യതയുള്ള ടീമാണ് ഇന്ത്യ. 2027ലെ ഏകദിന ലോകകപ്പിലും ഇന്ത്യ മികച്ച പോരാട്ടം നടത്തേണ്ടതുണ്ട്. അതിനായി ടീം മാനേജ്മെന്റും താരങ്ങളും തമ്മിൽ മികച്ച ആശയവിനിമയം ഉണ്ടാകണം.' ബിസിസിഐ പ്രതിനിധി വ്യക്തമാക്കി.
Content Highlights: BCCI calls meeting to address communication gaps between management and senior players